Американинг йирик бизнес вакиллари Марказий Осиёда инвестиция ва инфратузилма лойиҳаларида шериклик алоқаларини кенгайтиришни қўллаб-қувватламоқда
Ўзбекистоннинг АҚШдаги элчихонаси АҚШ ҳукумати, молия институтлари ва йирик компаниялари вакиллари учун брифинг ўтказди, деб хабар бермоқда «Дунё» АА мухбири.
Махсус тақдимот чоғида элчи Жавлон Ваҳобов Ўзбекистонда иқтисодий фаолиятни ҳар томонлама қўллаб-қувватлаш, шунингдек, минтақавий ва халқаро савдо-иқтисодий алоқаларни ривожлантириш бўйича амалга оширилаётган кенг кўламли чора-тадбирлар тўғрисида сўзлаб берди.
Анжуман иштирокчиларига Халқаро тараққиётни молиялаштириш корпорацияси (DFC) ижрочи директори Адам Бойлернинг Ўзбекистонга ташрифининг асосий натижалари, шунингдек, 29 июнь - 1 июль кунлари бўлиб ўтган «Марказий Осиё-АҚШ» (С5 + 1) юқори даражадаги вазирлар учрашуви якулари тўғрисида маълумот берилди.
Тадбирда расмий доиралар, халқаро молия институтлари, йирик корпорациялар ва етакчи консалтинг компаниялар, Давлат департаменти, Савдо вазирлиги, АҚШ савдо ваколатхонаси, АБР, EXIM Bank, Boeing, Caterpillar, CNH Industrial, General Electric, Exxon Mobil, General Motors, John Deere, MIR Corporation, Sierra Nevada Corporation, SRX Transcontinental, Valley Irrigation, White & Case, Macro-Advisory вакиллари қатнашди.
Брифинг аввалида Ўзбекистон ва АҚШ ўртасидаги иқтисодий ва сиёсий йўналишдаги ҳамкорлик динамикаси барқарор ўсаётгани қайд этилди. Икки томонлама кун тартибининг моҳиятан шакллантирилиши минтақавий контекстда ҳам ижобий акс этаётгани таъкидланди. Бу инвестиция ва инфратузилма соҳасида шериклик алоқаларини кенгайтириш, алоқаларни яхшилаш, савдо-сотиқни ривожлантириш ва Марказий Осиёда иқтисодий барқарорликни таъминлаш учун янги имкониятлар очиб беради.
Йирик компаниялар раҳбарлари Адам Бойлернинг Ўзбекистонга биринчи ташрифи натижаларини юқори баҳолади. У Ўзбекистонда Олий Мажлис Сенати, Ташқи ишлар, Инвестициялар ва ташқи савдо вазирликлари, бошқа муассасалар ҳамда идоралар раҳбарлари билан самарали музокаралар олиб борди.
Хусусан, Ўзбекистон ҳукумати вакилларининг Адам Бойлер билан самарали учрашувлари корпорациянинг хусусий сектор ва инфратузилмани ривожлантиришга қаратилган устувор лойиҳалар ҳамда ташаббусларни биргаликда молиялаштириш орқали мамлакатдаги ижтимоий-иқтисодий ислоҳотлар жараёнида иштирок этишдан манфаатдорлигини намойиш этганлиги алоҳида таъкидланди.
Америкалик тадбиркорларнинг фикрига кўра, Ўзбекистон томонининг DFC билан биргаликда қишлоқ хўжалиги, енгил саноат, фармацевтика ва қурилиш материаллари ишлаб чиқариш соҳаларида аниқ инвестиция лойиҳаларини амалга ошириш тўғрисидаги таклифи мамлакатнинг АҚШ билан ўзаро иқтисодий муносабатларни изчил ривожлантириш тарафдори эканини яққол намойиш этмоқда.
Брифинг давомида Ўзбекистондаги йирик давлат корхоналари ва тижорат банкларини хусусийлаштириш билан шуғулланувчи хусусий инвесторларни молиялаштириш учун DFCни жалб қилиш хорижий компанияларнинг Ўзбекистон бозорига чиқиши ва мавжуд имкониятларини кенгайтириш учун қўшимча омил бўлиши алоҳида таъкидланди.
Элчихонанинг маълум қилишича, Америка компаниялари аёллар тадбиркорлиги ва гендер тенглигини қўллаб-қувватлаш бўйича ҳамкорликни янада кенгайтиришни фаол қўллаб-қувватламоқда. Бу Ўзбекистон ҳукуматининг аёлларга тенг ҳуқуқ ва имкониятлар бериш тамойилларига асосланган мамлакатда ижтимоий-иқтисодий ривожланиш даражасини ошириш тарафдори эканининг муҳим кўрсаткичидир.
Тадбир иштирокчилари Америка Қўшма Штатлари Ўзбекистоннинг DFC ва бошқа Америка институтлари билан мажбурий меҳнатга қарши курашиш, ижтимоий ва иқтисодий муаммоларни ҳал қилиш, Ўзбекистонда ўз бизнесини очишни режалаштирган аёлларнинг инновацион технологияларидан фойдаланиш, қишлоқ жойларда аёллар тадбиркорлигини ривожлантириш, аёлларга нисбатан зўравонликка қарши курашиш ва одам савдосининг олдини олиш бўйича чора-тадбирларни амалга ошириш каби долзарб муаммоларни ҳал этишда парламентнинг ролини ошириш бўйича ўзаро манфаатли шерикликни қўллаб-қувватлайди.
Тадбир доирасида Афғонистонни минтақавий жараёнларга жалб қилиш масаласи ҳам муҳокама қилинди. Таъкидланганидек, 27 май куни бўлиб ўтган «Ўзбекистон-АҚШ-Афғонистон» уч томонлама йиғилиши ушбу механизм Афғонистон Ислом Республикасини қайта тиклаш ва унинг Марказий Осиёнинг иқтисодий-сиёсий ҳаётидаги фаол иштироки бўйича амалий таклифларни ишлаб чиқиш учун муҳимлигини тасдиқлади.
DFCнинг Афғонистон ва минтақа мамлакатлари ўртасидаги иқтисодий, транспорт ва коммуникация алоқаларини кенгайтиришга ҳисса қўшадиган қатор лойиҳаларга қизиқиши бутун Марказий Осиёдаги инвестиция муҳитига ижобий таъсир кўрсатишини таъкидлади.
Тадбир иштирокчилари Тошкентнинг АҚШ ва Марказий Осиё давлатларининг Савдо ва инвестициялар тўғрисидаги битим (TIFA) доирасидаги қўшма ишларни кучайтириш ва унинг Афғонистон таркибига кириши сабабли кенгайиши истаги америкалик сармоядорлар учун яхши сигнал эканини таъкидлади. Бундан ташқари, АҚШ экспорт-импорт банки ва Савдо вазирлигининг Халқаро савдо маъмурияти билан яқин ҳамкорлик истиқболларини кўриб чиқадиган С5 + 1 иқтисодий ишчи гуруҳини тузиш тўғрисидаги қарор иккала томоннинг манфаатларига хизмат қилиши қайд этилди.
Умуман олганда, АҚШнинг йирик компаниялари иштирокида ўтган брифинг натижалари Америка бизнес ҳамжамиятининг Ўзбекистондаги сармоявий фаолиятни ривожлантиришга қизиқиши ортиб бораётгани, шунингдек, минтақавий шароитда ва DFCнинг фаол кўмаги билан янги истиқболли лойиҳаларни амалга оширишга тайёрлигини яна бир бор намойиш этди.
